2020 මැයි 01 දා

එදා හිටියෙ වහල්ලු
දම්වැල් දාගෙන වැදගෙන
හාම්පුතා කියන හැම
දහදුරා වැඩේම කර කර...

ඒත් කැරලි ගැහුවා
ස්පාර්ටකස්ලා එදත්
තමන්ගේ නිදහස
වෙනුවෙන්...

අදත් ඉන්නවා වහල්ලු
දම්වැල අලුත් වෙලා
ටයි එක දාගෙන
කෝට් ඇදගෙන
ඒසී එකේ ඉදගෙන...

ගල් කඩන,පොල් කඩන
කම්හලේ යකඩ උස්සන
කම්කරු ගොවියන් හැමදෙන
ඇග වෙහෙසනවා වගේම...

දොස්තර,එකවුන්ටන්ට්
ඉංජිනේරු,සුපවයිසර්
මොලේ වෙහෙසන එවුනුත්
මොකෙකුගෙ හරි වහලුන් බව
උන් දන්නේ නෑ තාමත්...

ටයි කෝට් එකෙන්
වැහිලා උන්ගේ මොල
ඒසී එකේ සීතලට
ගල් වෙලා....

ජාත්‍යන්තර කම්කරු දිනය
මැයි 01

දුර ඈත තරුවට

පුංචි තරුවක් පායලා
පාලු නිල් අහසට
ඒ නමුදු දුරයි එය
මා සිටින පොලොවට
තරුව නුඹ නවතින්න
සඳ එක්ක සදහට
ඔය එලිය විතරක්ම
එවනු මගෙ කුටියට...

ඩාවින්සිගෙන් මොනාලීසාට

සුන්දර ෆ්ලොරෙන්සියානු පුරවර
පිපුණු සුදු කානේෂන් මල
මොනාලීසා
මොනාලීසා...

ඔය රූසිරෙන් මත්ව
ආර්නෝ ගඟෙන් එතෙරව
එමි මම නුඹව සොයාන
මොනාලීසා
මොනාලීසා...

තෙලිතුඬින් ගෙන
මට අහිමි ඔය
සුමුදු රතු දෙකොපුල
කැන්වසයක තවරමි
මොනාලීසා
මොනාලීසා...

ඒ නමුදු මගේ පෙම
නොසඟවමි
කැන්වසය පුරා විසිරුවමි
මොනාලීසා
මොනාලීසා...

තව වසර සියයක්ද ඉන්පසුද
අප අතර ඉපදුණ
ඒ නමුදු නොකියුන
ප්‍රේමය
ලෝකයට දකින්නට
නුඹේ සිනාවේ දවටමි
මොනාලීසා
මොනාලීසා....

නුඹට

හිරු ගිලී මියඇදෙන
පාලු සීතල
 හවසක්
සුදුම මීදුම් අතර
තනිවෙන්න
 මොහොතක්
නුඹ ඇවිත් දැවටෙන්න
වෙලා ගී තනුවක්
සමවැදී විදිමි මම
නිරාමිස සුවයක්...

සුළඟ සහ කඩුපුල

නම නොදන්නා බිමක
පිපුණු කඩුපුල් මලක්
සුවඳ දෙයි රෑ පුරා
උදෑසනටත් එක්ක...

සුළඟ දුරු රට ඉදන්
ගෙන එන්න ඒ සුවඳ
දොර කවුලු හැර දමා
පිළිගනිමි මම නුඹව...